మొన్న 86, ఇప్పుడు 23 వాహనాలు ఢీ..14 మంది మృతి ▶️

  • యూఏఈలో ఘోర రోడ్డు ప్రమాదం..▶️
  • 14 మంది మృతి.. మృతుల్లో భారతీయులు!

యునైటెడ్ అరబ్ ఎమిరేట్స్‌లో ఘోర రోడ్డు ప్రమాదం తీవ్ర విషాదాన్ని నింపింది. ఫుజైరా ఎమిరేట్‌లో జరిగిన భారీ బహుళ వాహనాల ప్రమాదంలో 14 మంది ప్రాణాలు కోల్పోగా.. మరో 30 మంది గాయపడ్డారు. మృతుల్లో భారతీయులు కూడా ఉండటం ఆందోళన కలిగిస్తోంది.

షేక్ ఖలీఫా బిన్ జాయెద్ రోడ్డుపై ఈ ప్రమాదం చోటుచేసుకుంది. వేగంగా వెళ్తున్న ఓ ట్రక్కు డ్రైవర్ నియంత్రణ కోల్పోవడంతో మరో వాహనాన్ని ఢీకొట్టింది. అనంతరం ట్రక్కు అదుపుతప్పి నెమ్మదిగా వెళ్తున్న ట్రాఫిక్‌లోని వాహనాలపైకి దూసుకెళ్లింది.

ఈ ప్రమాదంలో మొత్తం 18 కార్లు, 5 ట్రక్కులు.. కలిపి 23 వాహనాలు చిక్కుకున్నాయి. ఢీకొన్న వెంటనే ట్రక్కులో మంటలు చెలరేగి ఇతర వాహనాలకూ వ్యాపించాయి. దీంతో భారీ ప్రాణనష్టం సంభవించింది.

గాయపడిన 30 మందిలో 15 మందికి చికిత్స అనంతరం ఆసుపత్రుల నుంచి డిశ్చార్జ్ చేశారు. మరో 15 మంది ఆసుపత్రుల్లో చికిత్స పొందుతున్నారు.

మృతుల్లో భారతీయులు ఉన్నట్లు దుబాయ్‌లోని భారత కాన్సులేట్ ధ్రువీకరించింది. బాధిత కుటుంబాలను సంప్రదించి, స్థానిక అధికారులతో కలిసి అవసరమైన సహాయ సహకారాలు అందిస్తున్నట్లు వెల్లడించింది.

మృతుల్లో కొందరి గుర్తింపును నిర్ధారించేందుకు డీఎన్ఏ పరీక్షలు నిర్వహిస్తున్నారు. ప్రమాదానికి గల పూర్తి కారణాలపై అధికారులు దర్యాప్తు కొనసాగిస్తున్నారు.

విదేశాల్లో భారతీయుల ప్రాణాలు బలిగొన్న ఈ విషాద ఘటనతో ప్రవాస భారతీయుల్లో ఆందోళన నెలకొంది.

  • యూఏఈలో ఘోర రోడ్డు ప్రమాదం.. 14 మంది మృతి!

  • 23 వాహనాలు ఢీ.. ట్రక్కులో చెలరేగిన మంటలు!

  • మృతుల్లో భారతీయులు.. రంగంలోకి భారత కాన్సులేట్!

  • 30 మందికి గాయాలు.. కొనసాగుతున్న దర్యాప్తు!

ట్రెండింగ్ న్యూస్