2027, జూన్ 2 నాటికి టిమ్స్ ఆస్పత్రులు రెడీ !

  • తెలంగాణలో ప్రభుత్వ వైద్య సేవలకు మహర్దశ..
  • ఆసుపత్రుల నిర్మాణంపై సీఎం రేవంత్ కీలక ఆదేశాలు!

తెలంగాణలో ప్రభుత్వ వైద్య సేవలను మరింత బలోపేతం చేసే దిశగా ముఖ్యమంత్రి రేవంత్ రెడ్డి కీలక నిర్ణయాలు తీసుకున్నారు. వచ్చే ఏడాది జూన్ 2వ తేదీ నాటికి అల్వాల్, ఎల్‌బీనగర్ టిమ్స్ ఆసుపత్రులతో పాటు వరంగల్ సూపర్ స్పెషాలిటీ ఆసుపత్రి, నిమ్స్ విస్తరణ పనులను పూర్తి చేయాలని అధికారులను ఆదేశించారు. ఇక నూతన ఉస్మానియా ఆసుపత్రి నిర్మాణాన్ని వచ్చే ఏడాది డిసెంబర్ నాటికి పూర్తి చేసి ప్రజలకు అందుబాటులోకి తీసుకురావాలని స్పష్టం చేశారు.

ఎంసీఆర్‌హెచ్‌ఆర్‌డీలో నిర్వహించిన ఉన్నతస్థాయి సమీక్షలో మంత్రి దామోదర రాజనర్సింహతో కలిసి సీఎం ఈ నిర్ణయాలు తీసుకున్నారు. ఆసుపత్రుల నిర్మాణంతో పాటు అవసరమైన వైద్య పరికరాల కొనుగోలు, వైద్యులు, సిబ్బంది నియామకాలను కూడా ఏకకాలంలో పూర్తి చేయాలని ఆదేశించారు.

ప్రభుత్వ ఆసుపత్రుల్లో పడకల సంఖ్యను 30 వేల నుంచి 38 వేలకు పెంచామని సీఎం వెల్లడించారు. రాజీవ్ ఆరోగ్యశ్రీ పథకం కింద ఒక్కో కుటుంబానికి అందించే వైద్య చికిత్సల పరిమితిని 5 లక్షల నుంచి 10 లక్షల రూపాయలకు పెంచిన విషయాన్ని గుర్తుచేశారు.

మూడు టిమ్స్ ఆసుపత్రుల్లో వైద్యులు, సిబ్బంది నియామకాలను ఏకీకృత విధానంలో చేపట్టాలని, అవసరాలకు అనుగుణంగా సిబ్బందిని బదిలీ చేసే వెసులుబాటు కల్పించాలని సూచించారు. ఆసుపత్రుల నిర్వహణ, హౌస్ కీపింగ్ బాధ్యతలను ఔట్‌సోర్సింగ్ విధానంలో చేపట్టడంతో పాటు పర్యవేక్షణ కోసం గ్రూప్-1 అధికారులు, విశ్రాంత సైనికాధికారులను నియమించనున్నట్లు తెలిపారు.

నిమ్స్‌లో శస్త్రచికిత్సలకు ఆలస్యం జరుగుతున్న నేపథ్యంలో సనత్‌నగర్ టిమ్స్‌ను పూర్తిస్థాయిలో వినియోగించుకోవాలని సీఎం ఆదేశించారు. నిమ్స్‌లో పడకలు అందుబాటులో లేకపోయినా, శస్త్రచికిత్సలకు ఆలస్యమైనా రోగులకు సనత్‌నగర్ టిమ్స్‌లో వైద్య సేవలు అందించాలని సూచించారు.

మరోవైపు రాష్ట్రంలో కొత్తగా 16 డయాలసిస్ కేంద్రాలను ఏర్పాటు చేశామని, నిర్మాణంలో ఉన్న మరో 79 కేంద్రాల పనులను త్వరగా పూర్తి చేయాలని ఆదేశించారు. ప్రభుత్వ ఆసుపత్రుల్లో వైద్యులు, సిబ్బంది హాజరును ఏఐ పర్యవేక్షణతో కూడిన బయోమెట్రిక్ విధానంలో నమోదు చేయాలని సూచించారు.

గత మూడేళ్లలో వైద్యులు, నర్సులు, ఏఎన్ఎంలు, పారామెడికల్ సిబ్బంది కలిపి 13,401 నియామకాలు పూర్తి చేశామని, మరో 5,640 నియామకాలు కొనసాగుతున్నాయని సీఎం తెలిపారు. ప్రజారోగ్యానికి ప్రాధాన్యతనిస్తూ వైద్యారోగ్య శాఖకు అవసరమైన నిధులను విడుదల చేస్తామని స్పష్టం చేశారు.

మొత్తంగా తెలంగాణలో ప్రభుత్వ వైద్య వ్యవస్థను మరింత ఆధునికీకరించి, పేదలకు నాణ్యమైన వైద్య సేవలను అందుబాటులోకి తీసుకురావడమే లక్ష్యంగా ప్రభుత్వం ముందుకు సాగుతోంది.

  • జూన్ 2 నాటికి నాలుగు కీలక ఆసుపత్రుల పనులు పూర్తి!

  • వచ్చే ఏడాది డిసెంబర్ నాటికి కొత్త ఉస్మానియా ఆసుపత్రి!

  • టిమ్స్‌లలో వైద్యులు, సిబ్బంది నియామకాలకు వేగం!

  • తెలంగాణలో మరో 79 డయాలసిస్ కేంద్రాలు!

  • ప్రభుత్వ ఆసుపత్రుల్లో ఏఐ పర్యవేక్షణతో బయోమెట్రిక్ హాజరు!

ట్రెండింగ్ న్యూస్