• తెలంగాణలో ‘బర్తరఫ్’ రాజకీయాలు
• నాడు ఈటల.. నేడు కొండా సురేఖ

తెలంగాణ రాజకీయాల్లో ‘బర్తరఫ్’ అనేది కేవలం పదవి నుంచి తొలగించడం మాత్రమేనా?… లేక ఒక రాజకీయ అధ్యాయానికి తెరలేపే నిర్ణయమా? ఇప్పుడు ఇదే ప్రశ్న రాజకీయ వర్గాల్లో ఆసక్తిని రేపుతోంది. గతంలో కెసిఆర్ సర్కార్ ఈటల రాజేందర్ ను బర్తరఫ్ చేసింది.. నేడు రేవంత్ సర్కార్ కొండ రేఖను బర్తరఫ్ చేసింది. 2021లో అప్పటి ముఖ్యమంత్రి కేసీఆర్‌ ప్రభుత్వంలో కీలక మంత్రిగా ఉన్న ఈటల రాజేందర్‌పై అవినీతి ఆరోపణలు రావడంతో ఆయనను మంత్రి పదవి నుంచి తొలగించారు. ఆ పరిణామం తర్వాత ఈటల బీఆర్ఎస్‌కు గుడ్‌బై చెప్పి ఎమ్మెల్యే పదవికి కూడా రాజీనామా చేసి బీజేపీలో చేరారు. అనంతరం హుజూరాబాద్ ఉప ఎన్నికలో బీజేపీ అభ్యర్థిగా విజయం సాధించడం తెలంగాణ రాజకీయాల్లో కీలక మలుపుగా మారింది. ఇప్పుడు సీన్ మారింది… ప్రభుత్వం మారింది…కథ ఒక్కటే కానీ పాత్రలు మారాయి.. కానీ ప్రశ్న మాత్రం అదే.

కొండా సురేఖ వ్యవహారం కాంగ్రెస్‌లో అంతర్గత క్రమశిక్షణ, పార్టీ లైన్, నాయకత్వ నిర్ణయాల చుట్టూ తిరుగుతోంది. ముఖ్యమంత్రి రేవంత్‌రెడ్డి సైతం పార్టీ క్రమశిక్షణకు అందరూ కట్టుబడి ఉండాలని, ఈ వ్యవహారాన్ని పార్టీ క్రమశిక్షణ కమిటీ చూస్తుందని స్పష్టం చేశారు. ఇక్కడే ఈటల ఎపిసోడ్‌తో కొండా సురేఖ ఎపిసోడ్‌కు పోలికలు మొదలవుతున్నాయి. ఇద్దరూ బీసీ సామాజిక వర్గానికి చెందిన బలమైన నాయకులు. ఇద్దరూ తమ తమ పార్టీల్లో కీలకమైన మంత్రులుగా పనిచేసినవారే. ఇద్దరికీ తమ ప్రాంతాల్లో ప్రత్యేక రాజకీయ పట్టు ఉంది. అందుకే ఒకవేళ కొండా సురేఖపై కాంగ్రెస్ అధిష్ఠానం కఠిన చర్య తీసుకుంటే… ఆ తర్వాత ఆమె రాజకీయ ప్రయాణం ఏ దిశగా సాగుతుంది? అన్నది సహజంగానే ఆసక్తికరంగా మారుతోంది.

ఈటల బాటేనా?

ఈటల బర్తరఫ్ తర్వాత జరిగిన పరిణామాలు తెలంగాణ రాజకీయాలకు కొత్త సమీకరణాలను తెచ్చాయి. మంత్రి పదవి కోల్పోవడం, బీఆర్ఎస్‌ను వీడడం, ఎమ్మెల్యే పదవికి రాజీనామా చేయడం, బీజేపీలో చేరడం, ఆ తర్వాత ఉప ఎన్నికలో గెలవడం—ఇది ఒక నాయకుడి వ్యక్తిగత రాజకీయ పునరాగమనమే కాదు… తెలంగాణలో ప్రతిపక్ష రాజకీయ సమీకరణాలపై కూడా ప్రభావం చూపిన పరిణామం. అందుకే ఇప్పుడు రాజకీయ పరిశీలకుల చూపు కొండా సురేఖ తదుపరి అడుగుపైనే. ఆమె కాంగ్రెస్‌లోనే కొనసాగుతారా? పార్టీ అధిష్ఠానంతో రాజీకి వస్తారా? ఎమ్మెల్యే పదవికి రాజీనామా చేస్తారా? లేక ఈటల తరహాలో మరో రాజకీయ వేదికను ఎంచుకుంటారా? ఇవి ప్రస్తుతం సమాధానం లేని ప్రశ్నలే.

బీజేపీ ‘వెల్కమ్’ ఎందుకు?

ఇక మరోవైపు బీజేపీ ఇప్పటికే రాజకీయంగా ఒక తలుపు తెరిచింది. కొండా సురేఖ బీజేపీలోకి వస్తే ఆహ్వానిస్తామని ఎంపీ ధర్మపురి అర్వింద్ వ్యాఖ్యానించడం ఈ చర్చకు మరింత ఊతమిచ్చింది. వరంగల్ ప్రాంతంలో ఆమెకు ఉన్న రాజకీయ బలం కూడా ఈ వ్యాఖ్యల వెనుక ఉన్న ప్రధాన అంశంగా కనిపిస్తోంది. అయితే బీజేపీ ఆహ్వానం వేరు… కొండా సురేఖ నిర్ణయం వేరు. ఒక నాయకురాలిపై పార్టీ చర్య తీసుకుంటుందన్న ప్రచారం రావడం మాత్రమే ఆమె పార్టీ మారుతారనే అర్థం కాదు. రాజకీయాల్లో అసంతృప్తి, పార్టీ మార్పు, రాజీనామా—ప్రతి అడుగుకీ వేర్వేరు రాజకీయ లెక్కలు ఉంటాయి.

ఈటల ఎపిసోడ్ రిపీట్ అవుతుందా?

ఇదే అసలు ఆసక్తికరమైన ప్రశ్న. ఈటల బర్తరఫ్ తర్వాత బీఆర్ఎస్‌కు జరిగిన నష్టం వెంటనే కనిపించకపోయినా, ఆ పరిణామం తెలంగాణ రాజకీయాల్లో ఒక ప్రత్యామ్నాయ రాజకీయ కథనానికి బలమిచ్చింది. ఇప్పుడు కొండా సురేఖ విషయంలో కూడా అదే ఫార్ములా పనిచేస్తుందా? ఒక బలమైన బీసీ నాయకురాలిని పార్టీకి దూరం చేయడం కాంగ్రెస్‌కు రాజకీయంగా లాభమా? నష్టమా?
మరోవైపు, సురేఖ పార్టీ మారితే ఆమెతో పాటు వరంగల్ ప్రాంతంలో ఉన్న రాజకీయ ప్రభావం ఎంతవరకు బదిలీ అవుతుంది? ఇదే బీజేపీ లెక్క కూడా కావచ్చు.

అసలు పరీక్ష రేవంత్‌కేనా?

ఈ వ్యవహారం కొండా సురేఖ రాజకీయ భవిష్యత్తుకు మాత్రమే పరీక్ష కాదు. ఇది రేవంత్‌రెడ్డి నాయకత్వానికి కూడా ఒక పరీక్ష.
పార్టీలో క్రమశిక్షణ విషయంలో రాజీ ఉండదని అధిష్ఠానానికి, పార్టీ నేతలకు బలమైన సంకేతం ఇవ్వాలా? లేక బీసీ మహిళా నేతను రాజకీయంగా దూరం చేయకుండా సమస్యను పరిష్కరించాలా? ఈ రెండు మార్గాల్లో ఏది ఎంచుకున్నా దానికి రాజకీయ పరిణామాలు ఉంటాయి. అందుకే ఇప్పుడు తెలంగాణ రాజకీయాల్లో అసలు ప్రశ్న. “కొండా సురేఖను బర్తరఫ్ చేస్తారా?” అనేది మాత్రమే కాదు.“బర్తరఫ్ చేస్తే ఆ తర్వాత తెలంగాణ రాజకీయాల్లో ఏ కొత్త సమీకరణం మొదలవుతుంది?” అనేదే. ఈటల ఎపిసోడ్ తర్వాత తెలంగాణ రాజకీయాలు మారాయి. కొండా సురేఖ ఎపిసోడ్ తర్వాత కూడా అలాంటి మరో రాజకీయ మలుపు వస్తుందా? లేక ఈసారి కథ అక్కడితోనే ముగుస్తుందా? సమాధానం కోసం రాజకీయ తెలంగాణ ఇప్పుడు ఎదురుచూస్తోంది.

2021లో అప్పటి సీఎం కేసీఆర్ మంత్రివర్గంలో ఆరోగ్యశాఖ మంత్రిగా ఉన్న ఈటల రాజేందర్ పై అకస్మాత్తుగా భూకబ్జా ఆరోపణలు వచ్చాయి. విచారణ లేదు, వివరణకు అవకాశం లేదు – నేరుగా బర్తరఫ్. ఈటల అవమానంగా భావించి, ఎమ్మెల్యే పదవికి రాజీనామా చేసి బీజేపీ గూటికి చేరారు. ఆ ఒక్క ఘటన తెలంగాణ రాజకీయ ముఖచిత్రాన్ని మార్చేసింది. ఇప్పుడు దాదాపు అదే సీన్ రిపీట్. రేవంత్ కేబినెట్ లో కీలక మంత్రి, వరంగల్ స్ట్రాంగ్ లీడర్ కొండా సురేఖపై పార్టీ క్రమశిక్షణ ఉల్లంఘన పేరుతో వేటు పడింది. సోషల్ మీడియా పోస్టులు, అధిష్టానంపై అసంతృప్తి వ్యాఖ్యలే కారణంగా చూపిస్తున్నారు.

ఈటల ముదిరాజ్, కొండా సురేఖ పద్మశాలి – ఇద్దరూ తెలంగాణలో బలమైన బీసీ ముఖచిత్రాలు. ఇద్దరూ ఉద్యమ నేపథ్యం ఉన్నవారే, ఇద్దరూ కీలక శాఖలకు మంత్రులుగా పనిచేసినవారే. ఒకరిని అవినీతి ఆరోపణలతో, మరొకరిని క్రమశిక్షణ పేరుతో బయటకు పంపడం వెనుక రాజకీయ సంకేతాలు బలంగా వినిపిస్తున్నాయి. బీసీ ఓటు బ్యాంకు తెలంగాణలో నిర్ణయాత్మకం. కేసీఆర్ హయాంలో ఈటల బర్తరఫ్ ను బీసీలు అవమానంగా భావించారు. అది క్రమంగా బీఆర్ఎస్ కు దూరం కావడానికి ఒక ప్రధాన కారణమైంది. ఫలితం – కూలిపోయిన కేసీఆర్ సర్కార్. ఇప్పుడు రేవంత్ ప్రభుత్వం కూడా అదే తప్పు చేస్తోందా అనే చర్చ మొదలైంది. కాంగ్రెస్ లో బీసీలకు ప్రాధాన్యం తగ్గుతోందనే సంకేతం వెళ్తే, అది పార్టీకి మైనస్ అవుతుంది.

• ప్రస్తుతం ఈటల ఫార్ములానే కొండా సురేఖకు కూడా ముందుంది.
• 1. ఎమ్మెల్యే పదవికి రాజీనామా చేసి ఉప ఎన్నికకు వెళ్లడం
• 2. బీజేపీలో చేరడం

వరంగల్ లో కొండా దంపతులకు ఉన్న బలమైన క్యాడర్, బీసీ + రెడ్డి సామాజిక సమీకరణం బీజేపీకి కావాల్సిందే. అందుకే నిజామాబాద్ ఎంపీ ధర్మపురి అర్వింద్ ముందుగానే “వస్తానంటే వెల్కమ్” అని లైన్ క్లియర్ చేశారు.
అయితే ఈటలకు, కొండా సురేఖకు ఒక తేడా ఉంది. ఈటలపై అవినీతి ముద్ర వేసి పంపారు, కానీ ఆయన నిప్పులాంటి మనిషిగా బయటపడి సింపతీ కొట్టేశారు. కొండా సురేఖ విషయంలో అధిష్టానం “క్రమశిక్షణ” అనే పదాన్ని వాడింది. దీనిని ఆమె ఎలా ప్రజల్లోకి తీసుకెళ్తుంది అనేదే కీలకం. ఒకవేళ ఆమె కూడా బీజేపీలోకి వెళితే, తెలంగాణలో బీసీ నినాదం మళ్లీ బలంగా వినిపిస్తుంది. అది 2028 ఎన్నికల నాటికి రేవంత్ కు ఈటల మాదిరిగానే పెద్ద తలనొప్పిగా మారే అవకాశం ఉంది.

బర్తరఫ్ లు తాత్కాలికంగా అధికారాన్ని చూపించవచ్చు, కానీ తెలంగాణ చరిత్ర చెబుతున్నది ఒకటే – బీసీ నాయకుడిని అవమానించిన ప్రభుత్వం నిలబడలేదు. కేసీఆర్ విషయంలో అది నిజమైంది. రేవంత్ విషయంలో ఏం జరుగుతుందో వేచి చూడాలి.

-జి.మహేష్‌ కుమార్✍️
 సీనియర్ జర్నలిస్ట్