త్రికాల తెలుగు : హైదరాబాద్ : తెలంగాణ రాష్ట్ర బీజేపీ కార్యాలయంలో ఆ పార్టీ ప్రెసిడెంట్ రాంచందర్ రావు కోర్ అర్బన్ రీజియన్ ఎకానమీ (CURE) పరిధిలో కాంగ్రెస్ సర్కార్ తెచ్చిన ఇందిరమ్మ ఇళ్ల నిర్మాణ పథకంపై మీడియా సమావేశాన్ని నిర్వహించారు. ఈ సందర్బంగా ఆయన మాట్లాడుతూ….
“హైదరాబాద్లోని పేద, మధ్యతరగతి కుటుంబాలపై (CURE) పరిధిలో ఇందిరమ్మ ఇళ్ల పేరుతో ఆర్థిక భారం మోపేందుకు కాంగ్రెస్ ప్రభుత్వం ప్రయత్నం చేస్తోంది. CURE పేరుతో కాంగ్రెస్ ప్రభుత్వం ప్రజలకు PAIN తెచ్చిపెడుతోంది. రిజిస్ట్రేషన్ విలువ ఆధారంగా ప్రతి సంవత్సరం ఆస్తిపన్నును 5 శాతం వరకు పెంచే నిబంధనలతో పాటు, నీరు మరియు మురుగునీటి సేవలపై వేర్వేరుగా పన్నులు విధించడం ప్రజలపై భరించలేని ఆర్థిక భారాన్ని మోపుతుంది.
ఈ ప్రతిపాదిత చట్టంలో కార్పొరేటర్లు, వార్డు ప్రతినిధుల పాత్రపై స్పష్టత లేకపోవడమే కాకుండా, 74వ రాజ్యాంగ సవరణ స్ఫూర్తిని కూడా దెబ్బతీసేలా ఉంది. CURE చట్టంపై బీజేపీ అభ్యంతరాలను అసెంబ్లీలో బలంగా వినిపిస్తాం. ఇంత విస్తృత ప్రభావం చూపే చట్టాన్ని అమలు చేసే ముందు ప్రభుత్వం ప్రజలు, రెసిడెంట్ వెల్ఫేర్ అసోసియేషన్లు మరియు సంబంధిత భాగస్వాములందరితో తప్పనిసరిగా సంప్రదింపులు జరపాలి.
అలాగే, ఇందిరమ్మ ఇండ్ల పేరుతో జరుగుతున్న అన్యాయాన్ని కూడా వెలుగులోకి తెచ్చాను. 24 అసెంబ్లీ నియోజకవర్గాల్లో లక్షలాది మంది అర్హులైన కుటుంబాలు ఉండగా, ప్రభుత్వం కేవలం 7,680 ఫ్లాట్లకే నోటిఫికేషన్ జారీ చేసి, ప్రతి దరఖాస్తుదారుడి నుంచి రూ.100 దరఖాస్తు రుసుముతో పాటు రూ.10,000 ఈఎండీ వసూలు చేస్తోంది.
ఇది సంక్షేమం కాదు; పేదలను దోచుకుని వారి నుంచి దాదాపు రూ.1,000 కోట్లు వసూలు చేసే ప్రయత్నం. గత కాంగ్రెస్, బీఆర్ఎస్ ప్రభుత్వాల హయాంలో నిర్మించిన సద్భావన, అభిమాన్, పోచారం, చందానగర్, సహీరా, బోలక్పూర్, జవహర్నగర్ వంటి అనేక గృహ నిర్మాణ ప్రాజెక్టులు ఇప్పటికీ ఖాళీగానే ఉన్నాయి. ఆ ఇళ్లకు మరమ్మతులు చేసి అర్హులైన పేద కుటుంబాలకు కేటాయించాల్సిందిపోయి, రాబోయే జీహెచ్ఎంసీ ఎన్నికలను దృష్టిలో పెట్టుకుని కాంగ్రెస్ ప్రభుత్వం మరో నాటకానికి తెరతీసింది” అని రాంచందర్ రావు చెప్పారు.
